ސޯޝަލް ސެކިޔުރިޓީ ސެކްޓަރ ތަމްސީލް ކުރައްވާ މެންބަރެއްގެ ޙައިސިއްޔަތުން ޟިފާޒާ ވަޖީހު، ޕެންޝަން އޮފީހުގެ ބޯޑަށް ރައީސުލްޖުމްހޫރިއްޔާގެ އޮފީހުން އައްޔަން ކުރެއްވީ 24 ފެބްރުއަރީ 2020 ގައެވެ. މިވަގުތު ޝިފާޒާ އަދާކުރައްވަމުން ގެންދަވަނީ، ނޭޝަނަލް ސޯޝަލް ޕްރޮޓެކްޝަން އެޖެންސީގެ ޑިރެކްޓަރ ޖެނެރަލް އަދި ހެޑް އޮފް ސިވިލް ސަރވަންޓްސްގެ މަޤާމުގައެވެ. 2008 ގައި ނޭޝަނަލް ސޯޝަލް ޕްރޮޓެކްޝަން އެޖެންސީ އުފެދުނު އިރުން ފެށިގެން ޟިފާޒާ ވަނީ އެއެޖެންސީގެ އެކި މަޤާމްތައް ފުރުއްވާ ގިނަގުނަ ޚިދުމަތްތަކެއް ކުރައްވާފައެވެ.  

އެންސްޕާއާއި ގުޅިވަޑައިގެންނެވުމުގެ ކުރިން، ޝިފާޒާވަނީ ސަރުކާރުގެ އެކިއެކި މިނިސްޓްރީތަކުގެ ސޯޝަލް ސެކިޔުރިޓީ ސެކްޝަންގައި މަސައްކަތް ކުރައްވާ ތަޖުރިބާ ހޯއްދަވާފައެވެ. މީގެ އިތުރުން، ސޯޝަލް ހެލްތް އިންޝުއަރެންސް ސްކީމް، ސޯޝަލް ކޭޝް ޓްރާންސްފަރ ޕްރޮގްރާމް، ރިޓަރޔަމަންޓް އަދި ބޭސިކް ޕެންޝަން ސްކީމް ރީފޯމް ކުރުމުގެ މަސައްކަތް އަދި ޑިސެބިލިޓީ އެކްޓް ގެ މަސައްކަތްތަކުގެ އެކިލެވެލްގައި ވަނީ އަގުހުރި މަސައްކަތްތަކެއް ކުރައްވާފައެވެ. ނޭޝަނަލް ސޯޝަލް ހެލްތް އިންޝުއަރެންސް ސްކީމްގެ އަދި ވޭސްޓް މެނޭޖްމަންޓް ކޯޕަރޭޝަންގެ ބޯޑު މެމްބަރުކަންވެސް ޝިފާޒާ ވަނީ އަދާކުރައްވާފައެވެ. 

ތައުލީމީ ރޮނގުން، ޝިފާޒާ ވަނީ މެލޭޝިއާގެ ހެލްޕް ޔުނިވާސިޓީ އިން ބެޗްލަރ އޮފް އިކޮނޮމިކްސް (އޮނާރސް) އަދި އޮސްޓްރޭލިއާގެ ޔުނިވަރސިޓީ އޮފް ސިޑްނީ އިން ޑިވެލޮޕްމަންޓް ސްޓަޑީސް ގެ ރޮނގުން މާސްޓާސް ޑިގްރީ ހާސިލް ކުރައްވާފައެވެ. 

ކެޕިޓަލް މާކެޓް ޑިވެލޮޕްމަންޓް އޮތޯރިޓީ ތަމްސީލް ކުރައްވާ މެންބަރެއްގެ ޙައިސިއްޔަތުން ފާޠިމަތު ޢަބްދުﷲ ކަމާލުއްދީން، ޕެންޝަން އޮފީހުގެ ބޯޑަށް ރައީސުލްޖުމްހޫރިއްޔާގެ އޮފީހުން އައްޔަން ކުރެއްވީ 4 މާރޗް 2020 ގައެވެ.

ސީ.އެމް.ޑީ.އޭގެ މާކެޓް ޑިވެލޮޕްމަންޓް ދާއިރާގެ ޑިރެކްޓަރ ޖެނެރަލްގެ ހައިސިއްޔަތުން، އޮތޯރިޓީގެ މާކެޓް ޑިވެލޮޕްމަންޓް އިނީޝިއޭޓިވްސްގެ ހުރިހާކަަންތައްތަކެއް ބެލެހެއްޓުމުގެ ޒިންމާގެ އިތުރުން އޮތޯރިޓީގެ ސްޓެރެޓެޖިކް އަދި ޕޮލިސީ ލެވެލް އިނީޝިއޭޓިވްސް ތަކުގައި ފާޠިމަތު ދަނީ ހިއްސާވެ މުހިންމު ރޯލެއް އަދާކުރައްވަމުންނެވެ. ވޭތުވެދިޔަ 5 އަހަރުގެ މުއްދަތުގައި، ފާޠިމަތު ވަނީ އެއޮތޯރިޓީގެ ބޯޑުގެ ސެކްރެޓަރީ ކަމާއި އަދި ސީއީއޯގެ ސެކްރެޓޭރިއެޓްގެ ހައިސިއްޔަތުން ސްޓެރެޓެޖިލް ލެވެލްގެ ކަންކަމުގައި އަދި އޮތޯރިޓީއާއި ގުޅުންހުރި އިންޓަރނޭޝަނަލް އަދި މީޑިއާ ރިލޭޝަންސްގެ ކަންކަމުގައި ހަރަކާތްތެރިވެ ތަޖުރިބާ ހޯއްދަވާފައެވެ. މިގޮތުން، ކެޕިޓަލް މާކެޓާއި ގުޅުންހުރި ގިނަދާއިރާތަކުން ތަޖުރިބާ ހޯއްދަވާފައިވެއެވެ. 

ތައުލީމީ ރޮނގުން، ފާޠިމަތު ވަނީ އޫ.އެސް.އޭގެ މިޗިގަން ނޯތްވުޑް ޔުނިވަރސިޓީ އިން އިންޓަރނޭޝަނަލް ބިޒްނަސް އެންޑް މެނޭޖްމަންޓްގެ ރޮނގުން ބީ.އޭ.އޭ ހާސިލްކޮށް އޮސްޓްރޭލިއާގެ ޔުނިވަރސިޓީ އޮފް މެލްބަން އިން މެނޭޖްމަންޓް (ފައިނޭންސް) ގެ ރޮނގުން މާސްޓަރސް ޑިގްރީ ހާސިލްކުރައްވާފައެވެ. 

މިނިސްޓްރީ އޮފް ފިނޭންސް ތަމްސީލް ކުރައްވާ މެންބަރެއްގެ ޙައިސިއްޔަތުން މަރްޔަމް ޢަބްދުއްނާޞިރު، ޕެންޝަން އޮފީހުގެ ބޯޑަށް ދެވަނަ ދައުރަކަށް ރައީސުލްޖުމްހޫރިއްޔާގެ އޮފީހުން އައްޔަން ކުރެއްވީ 21 އޭޕްރީލް 2021 ގައެވެ. މަރްޔަމް ވަނީ 28 މާރޗް 2018 ގައި ޕެންޝަން އޮފީހާއި ގުޅިވަޑައިގެން، ވޭތުވެދިޔަ 3 އަހަރު ޕެންޝަން އޮފީހުގެ ބޯޑަށް ޚިދުމަތްކޮށްދެއްވާފައެވެ. 

މަރްޔަމް މިވަގުތު ވަޒީފާ އަދާކުރައްވަމުން ގެންދަވަނީ މިނިސްޓްރީ އޮފް ފިނޭންސްގެ ޗީފް ޑެޓް މެނޭޖްމެންޓް އެގްޒެކެޓިވްގެ ގޮތުގައެވެ. މަރްޔަމް މިނިސްޓްރީ އޮފް ފިނޭންސް އާއި ގުޅިވަޑައިގަތީ އޮކްޓޯބަރ 2009 ގައި އެކްސްޓާރނަލް ރިސޯސް މެނޭޖްމަންޓް ޑިވިޒަން (މިހާރުގެ ޑެޓް މެނޭޖްމަންޓް ޑިޕާޓްމަންޓް) ގެ ޑެސްކް އޮފިސަރެއްގެ ހައިސިއްޔަތުންނެވެ. މިގޮތުން، ވޭތުވެދިޔަ 8 އަހަރުގެ ތެރޭގައި މަރްޔަމް ވަނީ މިނިސްޓްރީގެ ރިސޯސް މޮބިލައިޒޭޝަން އެންޑް ޑެޓް މެނޭޖްމަންޓް ޑިޕާޓްމަންޓްގެ އިސް މަޤާމުތައް ފުރުއްވާފައެވެ.  

ތައުލީމީ ރޮނގުން މެލޭޝިއާގެ އޯޕަން ޔުނިވާސިޓީ އިން ބިސްނަސް އެޑްމިނިސްޓްރޭޝަން ގެ ރޮނގުން މަރްޔަމް ވަނީ މާސްޓާސް ޑިގްރީ ހާސިލް ކުރައްވާފައެވެ.

ޕްރައިވެޓް ސެކްޓަރ ތަމްސީލު ކުރައްވާ މެމްބަރެއްގެ ހައިސިއްޔަތުން އަލްފާޟިލް ޢަބްދުﷲ ޢަލީ، ޕެންޝަން އޮފީހުގެ ބޯޑަށް ރައީސުލްޖުމްހޫރިއްޔާގެ އޮފީހުން އައްޔަން ކުރެއްވީ ޑިސެމްބަރު 2018 ގައެވެ. އަދި އޭގެ ކުރިންވެސް މިނިސްޓްރީ އޮފް ފިނޭންސް އެންޑް ޓްރެޜަރީ ތަމްސީލުކުރައްވާ ސިވިލް ސަރވިސްގެ އިސް މުވައްޒަފެއްގެ ހައިސިއްޔަތުން ޢަބްދުﷲ ވަނީ 2017 ފެބްރުއަރީ އިން 2018 މާރޗް އަށް ޕެންޝަން އޮފީހުގެ ބޯޑުގެ މެމްބަރެއްގެ މަޤާމު ފުރުއްވާފައެވެ.

ޢަބްދުﷲ މިވަގުތު ވަޒީފާއަދާ ކުރައްވަމުން ގެންދަވަނީ އޭޝިއަން ޑިވެލޮޕްމަންޓް ބޭންކް (އޭޑީބީ) ގެ ރީޖަނަލް ކޯޕަރޭޝަން ސްޕެޝަލިސްޓްގެ މަޤާމުގައެވެ. އޭޑީބީ އާއި ގުޅިވަޑައިގެންނެވުމުގެ ކުރިން، ޢަބްދުﷲ މަސައްކަތް ކުރައްވާފައިވަނީމިނިސްޓްރީ އޮފް ފިނޭންސް އެންޑް ޓްރެޜަރީގެ ރިސޯސް މޮބިލައިޒޭޝަން އެންޑް ޑެޓް މެނޭޖްމަންޓް ޑިވިޝަންގެ ޑިރެކްޓަރ ޖެނެރަލްގެ މަޤާމުގައެވެ. އަދި ސަރުކާރާއި ގުޅިވަޑައިގެންނެވުމުގެ ކުރިން، ޕްރައިވެޓް ސެކްޓަރގައި މަސައްކަތް ކުރައްވާތަޖުރިބާ ހޯއްދަވާފައިވެއެވެ.

ޢަބްދުﷲ ވަނީ އީސްޓާރން މިޝިގަން ޔުނިވަރސިޓީއިން އިކޮނޮމިކްސްގެ ރޮނގުން މާސްޓަރސް ޑިގްރީއެއް ހާސިލްކުރައްވާފައެވެ. އަދި ޔުނިވަރސިޓީ އޮފް ވޭލްސްއިން އެކައުންޓިންގ އެންޑް ފައިނޭންސްގެ ދާއިރާއިން ބެޗެލަރ އޮފް އާޓްސް (އޮނަރސް) ހާސިލްކުރައްވާފައިވެއެވެ.

ޕްރައިވެޓް ސެކްޓަރ ތަމްސީލު ކުރައްވާ މެމްބަރެއްގެ ހައިސިއްޔަތުން އަލްފާޟިލާ އައިޝަތު ލުއުލުއާ ހަސަން، ޕެންޝަން އޮފީހުގެ ބޯޑަށް ރައީސުލްޖުމްހޫރިއްޔާގެ އޮފީހުން އައްޔަން ކުރެއްވީ މާރިޗު 2019 ގައެވެ. ލުއުލުއާއަކީ އާޓްސް އަދި ސަގާފަތް ކުރިއަރުވާ އިޖްތިމާއި ވިޔަފާރިއެއް ކަމަށްވާ އަވައްޓެރި ގެލެރީގެ ކޯ ފައުންޑާއެކެއެވެ.

ލުއުލުއާ ވަނީ ދައުލަތުގެ ފަރާތުން ޓެކްސްއާއި ބެހޭ ގާނޫނުތައް ތަންފީޒު ކުރާ އިދާރާ ކަމަށްވާ މޯލްޑިވްސް އިންލެންޑް ރެވެނިއު އޮތޯރިޓީގެ ބޯޑު މެންބަރުކަންވެސް އޯގަސްޓް 2010 އަކުން ފެށިގެން ފަސް އަހަރު ދުވަހުގެ މުއްދަތަކަށް އަދާކުރައްވާފައެވެ. އަދި ކެއަރ ރޭޓިންގްސް މޯލްޑިވްސްގައި މަސައްކަތް ކުރެއްވިއިރު ރާއްޖެއަށް ކްރެޑިޓް ރޭޓިންގ ތައާރަފް ކުރުމަށް މުހިންމު ދައުރެއް އަދާކުރެއްވުމުގެ އިތުރުން މޯލްޑިވްސް ސްޓޮކް އެކްސްޗޭންޖް އަދި މޯލްޑިވްސް ސެކިއުރިޓީސް ޑިޕޮސިޓަރީގައި މެނޭޖަރެއްގެ ގޮތުގައި ވަޒީފާ އަދާކުރައްވާ އެ ދާއިރާއިން ގިނަ ތަޖުރިބާތަކެއް ހާސިލް ކުރައްވާފައެވެ.

ރާއްޖެ އަދި ރާއްޖެއިން ބޭރުގައި ބޭއްވުނު ގިނަ އަދަދެއްގެ ފައިނޭންޝިއަލް ތަމްރީނުތަކާއި ފޯރަމްތަކުގައި ބައިވެރިވެ ވަޑައިގެންފައިވާއިރު ލުއުލުއާ ވަނީ ޕާޓް ޓައިމް ލެކްޗަރަރ އެއްގެ ގޮތުގައި ފެކަލްޓީ އޮފް މެނޭޖްމެންޓް އެންޑް ކޮމްޕިއުޓިންގައި 'މެނޭޖްމެންޓް އެންޑް އޯގަނައިޒޭޝަންސް' އުނގަންނަވައި ދެއްވުމުގެ މަސައްކަތްވެސް ކުރައްވާފައެވެ.

ލުއުލުއާ ވަނީ އިނގިރޭސި ވިލާތުގެ ޔުނިވަރސިޓީ އޮފް ވެސްޓްމިނިސްޓަރ އިން ބެޗެލަރ އޮފް ބިޒްނަސް މެނޭޖްމެންޓް ވިތް ފައިނޭންސް (އޮނަރޒް) ހާސިލް ކުރައްވާފައެވެ.

ޕްރައިވެޓް ސެކްޓަރ ތަމްސީލު ކުރައްވާ މެމްބަރެއްގެ ހައިސިއްޔަތުން އަލްއުސްތާޒާ ލައިލާ މަނިކް، ޕެންޝަން އޮފީހުގެ ބޯޑަށް ރައީސުލްޖުމްހޫރިއްޔާގެ އޮފީހުން އައްޔަނު ކުރެއްވީ 23 ޖޫން 2020 ގައެވެ. ލައިލާ ވަނީ ވޭތުވެދިޔަ 14 އަހަރު ގާނޫނީ ވަކީލެއްގެ ހައިސިއްޔަތުން ޕްރައިވެޓް ސެކްޓަރ އަދި މިނިސްޓްރީ އޮފް ޓުއަރިޒަމް އާރޓްސް އެންޑް ކަލްޗަރ ގެ ލީގަލް އޮފިސަރ މަގާމާއި ސީނިއަރ ލީގަލް އޮފިސަރ ގެ މަގާމު އަދާކުރައްވާފައެވެ. 

ސެޕްޓެމްބަރު 2010 އިން ފެށިގެން މިއަދާ ހަމައަށް މޮރިޝަސް ކޮމާރސިއަލް ބޭންކް މޯލްޑިވްސްގެ ޑައިރެކްޓަރ އަދި ކޮމްޕެނީ ސެކްރެޓެރީގެ މަގާމުވެސް ދަނީ އަދާ ކުރައްވަމުންނެވެ. ވޭތުވެދިޔަ އަހަރު ތަކުގައި ގާނޫނީ ރޮގުން ވިޔަފާރިއާއި ބޭންކިން ދާއިރާއިންވަނީ ގިނަ ތަޖުރިބާތަކެއް ހާސިލްކުރައްވާފައެވެ.

ލައިލާ ވަނީ އިނގިރޭސިވިލާތުގެ ޔުނިވަރސިޓީ އޮފް ލަންޑަން އިން ބެޗެލަރ އޮފް ލޯ (އެލް.އެލް.ބީ) ޙާސިލްކުރައްވާފައެވެ. 

ޕްރައިވެޓް ސެކްޓަރ ތަމްސީލު ކުރައްވާ މެމްބަރެއްގެ ހައިސިއްޔަތުން އަލްފާޟިލް ޢަބްދުލް ހަލީމް ޢަބްދުލް ލަތީފް ޕެންޝަން އޮފީހުގެ ބޯޑަށް ރައީސުލްޖުމްހޫރިއްޔާގެ އޮފީހުން އައްޔަނު ކުރެއްވީ 15 މާރޗް 2021 ގައެވެ. ހަލީމް މިވަގުތު ވަޒީފާ އަދާކުރައްވަމުން ގެންދަވަނީ ކްރޯވް މޯލްޑިވްސް އެޑްވައިޒަރީ ޕްރައިވެޓް ލިމިޓެޑްގެ މެނޭޖިން ޑިރެކްޓަރެއްގެ މަޤާމުގައެވެ. ސްޓްރެޓެޖީ ފޯމިއުލޭޝަން އެންޑް ޑިވެލޮޕްމަންޓް، އިންވެސްޓްމަންޓް އޮޕަރޭޝަންސް އެންޑް މެނޭޖްމަންޓް، ވެލުއޭޝަން، ރިސްކް އަދި ފައިނޭންޝަލް ޕްލޭނިންގ އެންޑް ކޮންޓްރޯލް ފަދަ ދާއިރާތަކުގައި މަސައްކަތްކޮށް ހަލީމް ވަނީ ތަޖުރިބާ ހޯއްދަވާފައިވެއެވެ. 

2010 ގައި  ޕެންޝަން އޮފީހާއި ގުޅިވަޑައިގެންނެވުމަށް ފަހު ސީނިއަރ މެނޭޖްމަންޓްގެ އެކިރޯލްތައް ހަލީމް ވަނީ އަދާކުރައްވާފައެވެ. މިގޮތުން 2018 ވަނަ އަހަރު ޕެންޝަން އޮފީހާއި ވަކިވެ ވަޑައިގެންނެވުމުގެ ކުރިން  ސީ.އެފް.އޯ ގެ ހައިސިއްޔަތުން ހަލީމް ވަނީ އޮފީހުގެ އެޑްމިނިސްޓްރޭޝަން އަދި އިންވެސްޓްމަންޓް މެނޭޖްމަންޓް އޮޕަރޭޝަންސް ބިނާ ކުރުމާއި ފައިނޭންްސް ޓީމް މެނޭޖްކޮށް ކުރިއެރުވުމުގައި މުހިންމު ރޯލެއް އަދާކުރައްވާފައެވެ

ރާއްޖޭގެ ފައިނޭންޝަލް އިންޓްސްޓިޓިއުޝަންސް ތަކުގެ އިސްމަޤާމުތައްވެސް ހަލީމް ފުރުއްވިއެވެ. މިގޮތުން، ބޭންކް އޮފް މޯލްޑިވްސް ގެ ޑެޕިއުޓީ ސީއެފްއޯގެ މަޤާމާއި މޮރިޝަސް ކޮމާރޝަލް ބޭންކްގެ ހެޑް އޮފް ކޯޕަރޭޓް ބޭންކިންގ ގެ މަޤާމް އަދި ސޮލަރެލް އިންޝުއަރެންސް ގެ ޑެޕިއުޓީ ސީއީއޯ ގެ މަޤާމް ވަނީ ފުރުއްވާފައެވެ. އަދި މީގެ އިތުރުން، މޯލްޑިވްސް ރެޑް ކްރެސެންޓްގެ ގަވަރނިންގ ބޯޑުގެ ޓްރެޝަރަރ ގެ މަޤާމް 2015 އިން 2018 ފުރުއްވާފައިވެއެވެ.

ދިވެހިރާއްޖޭގެ އިކޮނޮމީ، ފައިނޭންޝަން ސިސްޓަމްސް އަދި ސޯޝަލް ސެކިޔުރިޓީ އާއި ގުޅުންހުރި ރިސާރޗްތައް ހައްދަވާ ޕަބްލިޝް ކުރައްވުމުގެ އިތުރުން، ހަލީމް ދަނީ 'މޯލްޑިވްސް އިކޮނޮމިކް ރިވިއު' އަށް ރެގިއުލަރ ކޮށް ކޮންޓްރިބިއުންޓް ކުރައްވަމުންނެވެ.  

ހަލީމް ވަނީ އޮސްޓްރޭލިއާގެ ޔުނިވަރސިޓީ އޮފް ވޮލޮންގޮންގް އިން އެކައުންޓިން ރޮނގުން ފުރަތަމަ ޑިގްރީ ޙާސިލް ކުރައްވާފައެވެ. އަދި ހަލީމަކީ ޗާޓަރޑް އެކައުންޓެންޓެއްގެ އިތުރުން، ޔޫކޭގެ ޗާޓަރޑް އިންސްޓިޓިއުޓް އޮފް މެނޭޖްމަންޓް އެކައުންޓެންޓް (ސީމާ) ގެ މެންބަރެކެވެ. މީގެ އިތުރުން، އިންސްޓިޓިއުޓް އޮފް ޗާޓާރޑް އެކައުންޓަންޓްސް އޮފް މޯލްޑިވްސްގެ އެކަޑެމިކް ކޮމިޓީގެ މެމްބަރުކަން ވެސް ދަނީ ކުރައްވަމުންނެވެ.