ޗީފް އެގްޒެކެޓިވް އޮފިސަރގެ މަޤާމަށް އަލްފާޟިލާ ސުޖާތާ ޙަލީމް، ޕެންޝަން އޮފީހުގެ ބޯޑުން ޢައްޔަން ކުރެއްވީ 31 އޮކްޓޯބަރ 2022 ގައެވެ. 

މި މަޤާމަށް ޢައްޔަން ކުރެއްވުމުގެ ކުރިންވެސް، ސުޖާތާ ޙަލީމް ވަނީ ޕެންޝަން އޮފީހަށް އަގުހުރި ޚިދުމަތްތަކެއް ކޮށްދެއްވާފައެވެ. މިގޮތުން، އެކްޓިންގ ޗީފް އެގްޒެކެޓިވް އޮފިސަރގެ ހައިސިއްޔަތުން ޕެންޝަން އޮފީސް ހިންގެވުމުގެ ޒިންމާ 2 އަހަރަށްވުރެ ދިގު މުއްދަތެއް ވަންދެން އަދާކުރައްވާފައިވާއިރު، 2018 ވަނަ އަހަރުގެ ޖެނުއަރީ މަހުން ފެށިގެން އޮކްޓޯބަރ  2022 ގެ ނިޔަލަށް  ޗީފް އޮޕަރޭޓިންގ އޮފިސަރގެ މަޤާމު އަދާކުރެއްވިއެވެ. 

މީގެ އިތުރުން، ޕެންޝަން އޮފީހުގެ ޑިރެކްޓަރ ކޯޕަރޭޓް އެފެއާޒްގެ މަޤާމު 2016 ވަނަ އަހަރުގެ ޖުލައި މަހުން ފެށިގެން ޑިސެމްބަރ 2017 ގެ ނިޔަލަށް ފުރުއްވާފައިވާއިރު، ޑިރެކްޓަރ ޕްރޮގްރާމްސްގެ މަޤާމު ސެޕްޓެމްބަރ 2015 އިން  ފެށިގެން އަދާކުރެއްވިއެވެ. 

ދިވެހިރާއްޖޭގެ އިޖްތިމާޢީ ރައްކާތެރިކަމުގެ ނިޒާމު ހަރުދަނާ ކުރުމަށާއި، ޚާއްޞަކޮށް ދެމެހެއްޓެނިވި އަދި ޒަމާނީ ޕެންޝަން ނިޒާމެއް ތަޢާރަފު ކުރުމަށް ކުރެވުނު މަސައްކަތްތަކުގެ އެންމެ ކުރީ ސަފުގައި 2008 ވަނަ އަހަރުން ފެށިގެން މެދުނުކެނޑި ސުޖާތާ ޙަލީމް ޚިދުމަތް ކުރައްވާފައިވެއެވެ. މިގޮތުން، ވޯލްޑް ބޭންކުން ދިވެހިރާއްޖޭގައި ކުރިއަށް ގެންދެވި ޕެންޝަން އެންޑް ސޯޝަލް ޕްރޮޓެކްޝަން އެޑްމިނިސްޓްރޭޝަން ޕްރޮޖެކްޓް ހިންގެވުމުގައި  އިސް ދައުރެއް އަދާކުރެއްވިއެވެ. 

މިނިސްޓްރީ އޮފް ފިނޭންސް އަދި ޑިޒާސްޓަރ މެނޭޖްމަންޓް ސެންޓަރގެ އިސް މަޤާމުތަކެއްވެސް ސުޖާތާ ޙަލީމް ފުރުއްވާފައިވެއެވެ. ސުޖާތާ ޙަލީމް ވަނީ ފައިނޭންސް އެންޑް މާކެޓިންގ ދާއިރާއިން މާސްޓަރ އޮފް ބިޒްނަސް އެޑްމިނިސްޓްރޭޝަން އަދި ފައިނޭންސްގެ ރޮނގުން ބެޗްލަރ އޮފް ކޮމާސް ހާސިލް ކުރައްވާފައެވެ.

އަހްމަދު ޝަފީޒް ޕެންޝަން އޮފީހާއި ގުޅިވަޑައިގަތީ 2009 ވަނަ އަހަރުގައެވެ. ޝަފީޒްގެ މަސައްކަތުގެ މައްސޫލިއްޔަތުތަކުގެ ތެރޭގައި އޮޕަރޭޝަންސް ޑިޕާރޓްމަންޓް ބެލެހެއްޓެވުމާއި އައިޓީ ސިސްޓަމްސް އަދި ޑޭޓާ މެނޭޖްމަންޓް ސިސްޓަމްސް ހަރުދަނާކުރެއްވުން ހިމެނެއެވެ. ޕެންޝަން އޮފީހާއި ގުޅިވަޑައިގަތުމުގެ ކުރިން ހުންނެވީ މޯލްޑިވްސް މީޓިއޯރޮލޮޖިކަލް ސާވިސްގެ ޓެކްނިކަލް ސަޕޯޓް ސަރވިސަސްގެ އިސްވެރިއެއްގެ ގޮތުގައެވެ.

ޝަފީޒް ވަނީ އިންޑިޔާގެ ސިކިމް މަނިޕާލް ޔުނިވާރސިޓީ އޮފް ހެލްތް އެންޑް ޓެކްނޮލޮޖިކަލް ސައިންސަސްއިން މާރސްޓާސް އިން ކޮމްޕިއުޓަރ އެޕްލިކޭޝަންް ފުރިހަމަ ކުރައްވާފައެވެ. މީގެ އިތުރުން މެނޭޖްމަންޓް އިންފޮމޭޝަން ސިސްޓަމްސް އަދި އެޑްވާންސް ޓެކްނޮލޮޖީ އިން ބިޒްނަސް ސޮލިއުޝަންސްގެ ދާއިރާއިން ޝަފީޒް ވަނީ 10 އަހަރު ދުވަހުގެ ތަޖުރިބާ ހޯއްދާފައެވެ.

އައިޝަތު ނަޖްލާ ޕެންޝަން އޮފީހާއި ގުޅިވަޑައިގަތީ 2010 ވަނަ އަހަރުގައެވެ. މިއޮފީހުގެ އިންވެސްޓްމަންޓް ކޮމްޕްލައަންސާއި، އިންޓާރނަލް އޮޑިޓާއި ރިސްކް މެނޭޖްކުރުމުގެ ކަންކަން ބަލަހައްޓަވަނީ ނަޖްލާއެވެ.

ނަޖްލާ އޭނާގެ ފުރަތަމަ ވަޒީފާ ފެއްޓެވީ 2005 ވަނަ އަހަރު ބޭންކް އޮފް މޯލްޑިވްސް އިންނެވެ. ބޭންކް އޮފް މޯލްޑިވްސް ގައި ތަފާތު ދާއިރާތަކުގައި މަސައްކަތް ކުރެއްވިއެވެ.ޕެންޝަން އޮފީހުގެ ޑިރެކްޓަރގެ މަޤާމަށް ވަޑައިގަތުމުގެ ކުރިން، މި އޮފީހުގެ އޮޕްރޭޝަންސް، އެޑްމިން އެންޑް އެޗް އާރު އަދި އިންވެސްޓްމަންޓް ކޮމްޕްލައަންސް ޑިޕާޓްމަންޓް ފަދަ ޑިޕާޓްމަންޓް ތަކުގެ މެނޭޖީރިއަލް މަޤާމްތަކުގައި މަސައްކަތް ކުރައްވާ ގިނަގުނަ ތަޖުރިބާވަނީ ޙާސިލްކުރައްވާފައެވެ. ނަޖްލާވަނީ ނިއު ކާސަލް ޔުނިވަރސިޓީން އެމް.ބީ.އޭ އަދި މޮނާޝް ޔުނިވަރސިޓީން ބޭންކިންގ އާއި ފައިނޭންސް ދާއިރާއިން ބެޗެލަރސް ޑިގްރީ ހާޞިލް ކުރައްވާފައެވެ. މީގެ އިތުރުން، އޭޝިއަން ރިސްކްމެނޭޖްމަންޓް އިންސްޓިޓިއުޓުން ސަރިޓިފައިޑް ރިސްކް އެނަސިލްޓެއްގެ ޕްރޮފެޝަނަލް ސެޓްފިކެޓް ވަނީ ހާސިލްކުރައްވާފައެވެ.

މަރްޔަމް ޝިއުނާ ޕެންޝަން އޮފީހާ ގުޅިވަޑައިގަތީ އެޕްރީލް 2023 ގައެވެ. ޕެންޝަން އޮފީހުގެ ޗީފް އޮޕަރޭޓިންގ އޮފިސަރގެ ހައިސިއްޔަތުން ޝިއުނާގެ މަސައްކަތުގެ މަސްއޫލިއްޔަތުތަކުގެ ތެރޭގައި ހިމެނެނީ ޕެންޝަން ސަރވިސަސް ޑިވިޝަންގެ އެންމެހާ މަސައްކަތްތައް  ބެލެހެއްޓުމާއި، މަސައްކަތްތައް ހަރުދަނާކުރުމެވެ.

ޕެންޝަން އޮފީހާ ގުޅިވަޑައިގަތުމުގެ ކުރިން ޝިއުނާ ވަޒީފާ އަދާކުރެއްވީ އެންޓި-ކޮރަޕްޝަން ކޮމިޝަންގެ ރައީސްގެ މަގާމުގައެވެ. ޝިއުނާ ވަނީ ޓްރާންސްޕޭރަންސީ އިންޓަނޭޝަނަލްގެ ދިވެހިރާއްޖޭގެ ގޮފި، ޓްރާންސްޕޭރަންސީ މޯލްޑިވްސްގެ އެގްޒެކެޓިވް ޑިރެކްޓަރގެ މަގާމުވެސް އަދާ ކުރައްވާފައެވެ. ޝިއުނާވަނީ މުއައްސަސާތަކާއި ޖަމުއިއްޔާ ހިންގުމުގައި އިސްވެރިއެއްގެ ހައިސިއްޔަތުން 10 އަހަރުގެ ތަޖުރިބާ ހޯއްދަވާ، އެންޓި-ކޮރަޕްޝަނާއި، ގުޑް ގަވަރނަންސް އަދި ބިޒްނަސް އިންޓެގްރިޓީ ފަދަ ދާއިރާއިން ދިރާސާކުރުމާއި، ތަމްރީނު ޕްރޮގްރާމްތައް ރާވާ ހިންގުމާއި، ވަކާލާތުކުރުމާއި އަދި ސިޔާސަތުތައް ކަނޑައެޅުމުގެ ގިނަގުނަ ތަޖުރިބާ ހާސިލްކުރައްވާފައެވެ.

ޝިއުނާވަނީ ޔުނިވަރސިޓީ އޮފް ލަންޑަންގެ ސްކޫލް އޮފް އޮރިއެންޓަލް އެންޑް އެފްރިކަން ސްޓަޑީޒްއިން އިންޓަރނޭޝަނަލް ޑިވެލޮޕްމަންޓް ދާއިރާއިން މާސްޓަރސް ޑިގްރީ ހާސިލްކުރައްވައި، އަދި ލަންޑަން މެޓްރޮޕޮލިޓަން ޔުނިވަރސިޓީގެ ބެޗްލަރ އޮފް އާރޓްސް އިން ހިސްޓްރީ ހާސިލްކުރައްވާފައެވެ. މީގެ އިތުރުން، ބަރކްބެކް ކޮލެޖް، ޔުނިވަރސިޓީ އޮފް ލަންޑަންއިން ޕޯސްޓްގްރެޖުއެޓް ސެޓްފިކެޓް އިން ޕޮލިޓިކްސް ވަނީ ހާސިލްކުރައްވާފައެވެ.

އަލްފާޟިލާ ޙައްވާ ފަޖުވާއަކީ ޗާޓަރޑް ސަރޓިފައިޑް އެކައުންޓަންޓް އެއް އަދި ޗާޓަރޑް ޕަބްލިކް އެކައުންޓެންްޓެކެވެ. ފަޖުވާ ޕެންޝަން އޮފީހުގެ ޗީފް ފައިނޭންޝަލް އޮފިސަރގެ ގޮތުގައި މި އޮފީހާ ގުޅިވަޑައިގަތީ 22 އޮކްޓޯބަރ 2023 ގައެވެ.

ޕެންޝަން އޮފީހާ ގުޅިވަޑައިގަތުމުގެ ކުރިން ފަޖުވާ އަދާކުރައްވަމުން ގެންދެވީ މިނިސްޓްރީ އޮފް ފިނޭންސްގެ ޗީފް ޕަބްލިކް އެކައުންޓަންްޓްގެ މަޤާމެވެ. ޙައްވާ ފަޖުވާ ވަނީ ދިހަ އަހަރަށްވުރެ ދިގު މުއްދަތެއްގައި ޗާޓަރޑް އެކައުންޓަންޓެއްގެ ގޮތުގައި އާއި ރާއްޖޭގެ ލައިސަންސް އޮޑިޓަރއެއްގެ ގޮތުގައި ގިނަގުނަ މަސައްކަތްތަކެއް ކުރައްވާފައެވެ. އަދި ޕަބްލިކް ސެކްޓަރ އާއި ޕްރައިވެޓް ސެކްޓަރގައި މި ދާއިރާއިން ގިނަގުނަ ތަޖުރިބާ ހޯއްދަވާފައިވެއެވެ. މީގެ އިތުރުން ފަޖުވާއަކީ ރާއްޖޭގެ ގަރލް ގައިޑް އެސޯސިއޭޝަންގެ ހިންގާ ކޮމިޓީގެ މެމްބަރެކެވެ. 

ފަޖުވާ ވަނީ ރާއްޖެއާއި މެލޭޝިޔާގައި މަތީ ތަޢުލީމު ހާޞިލުކުރައްވައި، އޮކްސްފޯރޑް ބްރޫކްސް ޔުނިވަރސިޓީން ބެޗެލަރސް (އޮނަރސް) ޑިގްރީ އިން އެޕްލައިޑް އެކައުންޓިންގ އަދި އެސޯސިއޭޝަން އޮފް ޗާޓަރޑް ސަރޓިފައިޑް އެކައުންޓަންޓްސް (އޭ.ސީ.ސީ.އޭ) ގެ ޕްރޮފެޝަނަލް ސަރޓިފިކޭޝަން ޙާޞިލުކުރައްވާފައެވެ. ފަޖުވާ އަކީ އޭ.ސީ.ސީ.އޭ (ޔޫކޭ) ގެ ފެލޯ މެމްބަރެކެވެ. އަދި މީގެ އިތުރުން ޗާޓަރޑް އިންސްޓިޓިއުޓް އޮފް ޕަބްލިކް ފައިނޭންސް (ސިޕްފާ, ޔޫކޭ) ގެ މެމްބަރުކަމާއި، އޮސްޓްރޭލިއާގެ ސަރޓިފައިޑް ޕްރެކްޓިސިންގ އެކައުންޓަންޓްސް (ސީ.ޕީ.އޭ) ގެ މެމްބަރު ކަމާއި އިންސްޓިޓިއުޓް އޮފް ޗާޓަރޑް އެކައުންޓަންޓްސް އޮފް މޯލްޑިވްސްގެ ފެލޯ މެމްބަރުކަން ޙާޞިލުކުރައްވާފައި ވެއެވެ.