ޕެންޝަން އޮފީހުން ސިލްސިލާކޮށް ބާއްވަމުންދާ "ތްރީ ޖެނެރޭޝަން ވޯކް" (3ޖެންވޯކް) ގެ ހަތަރުވަނަ އެޑިޝަން 17 އޮކްޓޫބަރު 2026 ވާ ހޮނިހިރު ދުވަހު ހދ. ހަނިމާދޫގައި ބޭއްވުމަށް ވަނީ ހަމަޖެހިފައެވެ.

މިއީ ކުޑަކުދިންނާއި ބޮޑެތިމީހުން އަދި ދޮށީއުމުރުގެ މީހުން ހިމެނޭހެން، މުޅި އާއިލާއަށް ޚާއްޞަކޮށްގެން ބާއްވާ ހިނގާލުމެކެވެ. މި ހަރަކާތަކީ ދުޅަހެޔޮކަމާއި މާލީ ރައްކާތެރިކަން އިތުރުކުރުމާއެކު، ފަހަށް ފައިސާ ރައްކާކުރުމާއި، އިންވެސްޓްކުރުން އަދި ރިޓަޔަރމަންޓަށް ތައްޔާރުވުމުގެ މުހިންމުކަމާމެދު އާއިލާގެ ހުރިހާ މެންބަރުންގެ މެދުގައި ހޭލުންތެރިކަން އުފައްދައި، ރަނގަޅު މާލީ އާދަތަކަށް ބާރުއެޅުމުގެ ގޮތުން އަހަރަކު އެއްފަހަރު މި އޮފީހުން ކުރިއަށްގެންދާ ސިލްސިލާ ހަރަކާތެކެވެ. 

"3ޖެން ވޯކް" ގެ އެންމެ ޚާއްޞަ އަދި މުހިންމު އެއް ބަޔަކީ، އެއްއާއިލާގެ ތިން ޖީލުގެ މެންބަރުން އެކުއެކީގައި ކުރިއަށްގެންދާ 1 ކިލޯމީޓަރުގެ ރަމްޒީ ހިނގާލުމެވެ. މި ހިނގާލުމަކީ ހަމައެކަނި ހަށިހެޔޮކަމަށްޓަކައި ކުރިއަށްގެންދެވޭ ކަމެއް ނޫނެވެ. މިއީ މާލީ ގޮތުން ރައްކާތެރި، ތަނަވަސް މުސްތަޤުބަލެއް ބިނާކުރުމަކީ ދިރިއުޅުމުގެ ވަކި މަރުޙަލާއަކަށް އެކަނި ޚާއްޞަވެފައިވާ ކަމެއް ނޫންކަމާއި، އަދި އެއީ ޅައުމުރުން ފެށިގެން ދޮށީއުމުރާ ހަމައަށް މުޅި އުމުރުދުވަހަށް ދެމިގެންދާ ދަތުރެއްކަން ރަމްޒުކޮށްދޭ މުހިންމު ހަރަކާތެކެވެ. އަދި ހަމައެހެންމެ، މުސްތަޤުބަލުގެ މާލީ ރައްކާތެރިކަން ކަށަވަރުކުރުމަކީ އާއިލާގެ ކޮންމެ ޖީލެއްގެވެސް ޒިންމާއެއްކަން މި ހިނގާލުމުގެ ތެރެއިން ހަނދާންކޮށްދެއެވެ.

މި ހިނގާލުމަށްފަހު، ހުރިހާ އުމުރުފުރައެއްގެ ބައިވެރިންނަށްވެސް ބައިވެރިވެވޭނެ ފަދަ އުފާވެރި އަދި ފޯރިގަދަ ޢާއިލީ ހަވީރެއް ކުރިއަށްދާނެއެވެ. މި ހަވީރުގެ ތެރޭގައި ކުޑަކުދިންނާއި ބޮޑެތިމީހުން ޝައުޤުވެރިވާނެ ފަދަ ތަފާތު ކުޅިވަރުތަކާއި، ދިވެހިންގެ ސަގާފަތާއި އާދަކާދަ ދައްކުވައިދޭ ޚާއްޞަ ހަރަކާތްތައް ހިމެނެއެވެ. މީގެ އިތުރުން، އާންމުންނަށް މުހިންމު މަޢުލޫމާތުތައް ފޯރުކޮށްދިނުމަށް ޤާއިމުކުރެވިފައިވާ ސްޓޯލްތަކާއި، ތަފާތު އެކި ރަހަތައް ހިމެނޭ ފުޑް ކޯޓުގެ އިތުރުން، މުޅި އާއިލާއަށް އެކުގައި ހިތްހަމަޖެހުމާއި އުފާވެރިކަން ގެނެސްދޭނެ އެތައް ހަރަކާތްތަކެއް މި ހަވީރުގައި ހިމެނިގެންދާނެއެވެ.

"3ޖެން ވޯކް" ގެ މައިގަނޑު މަޤްޞަދަކީ އާއިލާގެ ތެރޭގައި އެކި ޖީލުތަކުގެ މެދުގައި އޮންނަ ގުޅުންތައް އިތުރަށް ބަދަހިކޮށް، އުފާވެރި މާޙައުލެއްގައި އާއިލާތަކަށް އެކުގައި އަގުހުރި ވަގުތުތަކެއް ހޭދަކުރުމުގެ ފުރުޞަތު ތަނަވަސްކޮށްދިނުމެވެ. އަދި ހަމައެއާއެކު، ދިރިއުޅުމުގެ ކުރިމަގަށް ވިސްނައި، ރިޓަޔަރމަންޓަށް ފުރިހަމައަށް ތައްޔާރުވުމާއި، ފަހަށް ރައްކާކުރުމުގެ މުހިންމު އާދަ އަށަގެންނެވުމަށްޓަކައި ޕެންޝަން އޮފީހުން މެދުކެނޑުމެއްނެތި ކުރިއަށްގެންދާ މަސައްކަތްތަކުގެ ތެރެއިންވެސް މި ހަރަކާތް ހިމެނެއެވެ.