ޒުވާނުންގެ މެދުގައި އިންވެސްޓްމަންޓާއި ގުޅޭ މަޢުލޫމާތާއި ހޭލުންތެރިކަން އިތުރުކުރުމަށްޓަކައި ޕެންޝަން އޮފީހުން ޚާއްސަ ޕްރޮގްރާމެއް އިފްތިތާހުކޮށްފިއެވެ. "ނެކްސްޓްޖެން އިންވެސްޓަރސް ހޭންގްއައުޓް" ގެ ނަމުގައި ކުރިއަށް ގެންދާ މި ޕްރޮގްރާމުގެ ފުރަތަމަ ސެޝަން ވަނީ 12 އޮކްޓޫބަރު 2024 ވަނަ ދުވަހު ކުރިއަށް ގެންގޮސްފައެވެ.
ޒުވާނުންނަށް އަމާޒުކޮށްގެން ބޭއްވުނު މި އިވެންޓުގައި ވަނީ އިންވެސްޓްކުރުމާއި ވިޔަފާރިކުރުމާއި ގުޅޭ މުހިންމު މަޢުލޫމާތު ފޯރުކޮށްދީފައެވެ. އެގޮތުން އިވެންޓުގެ ބައިވެރިންނަށް އިންވެސްޓްމަންޓް ޕްރޮފެޝަނަލުންނާއި ޒުވާން ވިޔަފާރިވެރިންނާއެކު މަޝްވަރާކޮށް ހިޔާލު ބަދަލުކުރުމުގެ ފުރުސަތު ލިބިެގންގޮސްފައިވެއެވެ. މި މަޝްވަރާތަކުގައި އަލިއަޅުވާލެވުނު މުހިންމު މައުޟޫއުތަކުގެ ތެރޭގައި އިންވެސްޓްކުރުމަށް ހުރި ފުރުސަތުތަކާއި ރިސްކް މެނޭޖްކުރުން އަދި ވިޔަފާރީގެ ދާއިރާ ހިމެނެއެވެ.
މި އިވެންޓަކީ ޕެންޝަން އޮފީހުގެ ފަރާތުން ޒުވާނުންގެ މެދުގައި އިންވެސްޓްކުރުމާއި މާލީ ކަންކަމާ ގުޅޭ ގޮތުން ހޭލުންތެރިކަން އިތުރުކުރުމަށް ކުރަމުން އަންނަ މަސައްކަތުގެ ތެރެއިން ކުރިއަށް ގެންދެވުނު ހަރަކާތެކެވެ.